Güdis Zyschtig – Dienstag, 04.03.2025

Höt han ech min erscht Omzog döffe metmache, begleitet vom Noah, Kaya ond de Valea, bin ich i mim Leiterwägeli vo mim Papi zoge worde. Be schönstem, sonnigem Wätter simmer gstarted. Es hed ordeli Lüüt am Strosserand gha wo mit tanzt ond klatsched hend wo d'Chacheler verbiizoge sind. S'Wätter hed zom Glöck metgmacht bis zom Schloss ond mir sind scho chli is schwizze cho. Mer hend e farbefrohe ond schöne Chrienser Omzog döffe erläbe.

Noch dem ich vom Grossi abgholt worde bin, sind mini Eltere mit de Chacheler weiter id Stadt zoge. Det hends bem Anker Träffponkt gha ond send mit Spiel zum Start vom Monster gloffe. Wie jedes Johr startet Chacheler au das Johr im 1. Block. S'wätter hed au am Abig schön mitmacht. Nochem stränge ond lange Omzog dör d'Altstadt hend sie sech weder i de Mostrose troffe. Nochmene super feine Znacht (Oh Schreck, das Johr gibt’s jo gar kei Piccata sondern es Schnizeli mit Zitronesause ond Risotto) heds d'Chacheler weder i Pfistergass zoge für es Abschlusskonzert mit de Hydra-Musig ond en Schlunzgi oder au zwei… Ond so schnell wies amigs god... Isch die Fasnacht 2025 au scho wieder Gschicht…

Sofie Annika Bauberger

mit Mami & Papi Link zur Fotogalerie